هاد المقال جلسنا عطيناه الخاطر باش نشرحو للمواطن البسيط و أي واحد كيفاش يستغل الذكاء الصناعي ولا بالتحديد الشاط جيبيتي chat gpt ديال open ai..

دابا فهاد عصر الديجيطال ماكاتسمع غير الكفائة و الفعالية و كيفاش التقنيات الحديثة و الماكينات الجديدة ولات كاتنقص على بنادم الوقت و تمارة فعصر السرعة و العولمة، و لكن الواقع غالبا ما كايخرج لينا لا علاقة له بالإشهار. ماكاين غير كثرة التخربيق و شحال من حاجة خاصك تديرها و البروغرام عامر و الأشغال و المهمات، زيدك حتى الإيمايلات اللي ماكايبقاوش يحبسو و التلفون غير كايغني ماكاين غير درتي مع هذا و لاخور و خاصك تعطي لكل حاجة عقل بوحدها باش تقضيها، و بإختصار كاتولي تقول ماكرهتش ندير على راسي شي فوطوكوبيات ولا روبواات يقضيو الغرض بلاصتي و ينقصو علينا الدرك و هنا فين كايبان الدور و الأهمية ديال Chat gpt بحال تيرميناتور جاي يكالي عليك فهاد الوقت اللي العالم كامل غير كايجري باش يلحق الريتم اللي غادي بيه التطور التكنولوجي فالسنوات الأخيرة… هاد الموصيبة ديال الجيبيتي لا عرفتي تخدم بيها ولا تدريسيها بحال اللي درت أنا، راه تقدر تردها تكتب بلاصتك بالداريجة و أنت غير دوي ليها 🤣🤣🤣

و لكن باش تخدم بالمساعدة ديال الذكااء الصناعي و داكشي يكون إيفيكااااص، راه كايطلب أكثر من أنك تقوليها بغيتك تصاوبي لي طيارة ولا بروغرام، باش تحكم الجهد ديال الذكاء الصناعي و ترجعو خادم بين يديك خاصك تبع واحد الإستراتيجية عملية و خطة ناضية باش تفاهم مع الماكينة على قد عقلها…
داكشي لاش غادي نقوليك زير السيور و شد معايا الخط باش نقوليك القوالب ديال الذاكا و كيفاش تقدر تعاون راسك باش تدير لاباس من والو إيييه من والو تدييير لاباس و قل الله أعلم..

الخطوة رقم واحد # تعرف على القواعد و الأساسيات

قبل ماتكسيري على الجيبيتي و تجبد ليها حناكها، خاصك تفهم شنو يقدر يدير و فين عندو الجهد و شنو اللي شاد اللي الفران و فين مايقدرش يزيد معاك، باش تطراسي التيران و تعرف فين تقدر تلعب، الجيبيتي مزيان و مجهد لا بغيتي يكتب ليك شي مقال إيمايل نص إنشائي إبداعي شنو ماكان أنت غير عطيه راس الخيط و خليه يبقى سارح فالمحتوى، و لكن مع ذلك راه ماغاديش يقدر يخترع ليك بزاااف من والو ضروري خاصك تبقى سارحو و زيد هادي هاك هادي لا هادي هنا و هاديك لهيه المهم هادشي غادي يتفهم مزيان بالتجربة ماشي غير بالهدرة و لكن هذا لا يمنع نديرو التذكير فالذكرى تنفع المؤمنين، المهم هادشي.ديال الذكااء الصناعي خاصك تعامل معاه على أساس أنه معلم ولا أستاذ فالدومين اللي بغيتي خاصك غير تشرح ليه بالضبط شنو بغيتي و تعطيه باش يكمل…

الخطوة رقم جوج # تحديد الأهداف

خاصك تكون عارف شنو بغيتي و شنو النتيجة النهائية اللي خاصك تخرج و إلا غادي تلقى سرحتي مع المصيبة لشي عالم مايمكنش، و لهذا لا كنتي باغي تقضي شي مهمة بمساعدة الذكاء خاصك تحدد مزيان فعقلك شنو بغيتي باش تعرف طريقة صياغة الطلب باش الذاكا يفهم و يعطيك داكشي نااااضي كندي، سواء بغيتي فكرة مشروع، شي إمايل ديال إستقالة، ولا شي مقال على تربية الحلزون في أعالي الجبال، المهم هو تعرف أشمن بيت باغي تماركي…

الخطوة الثالثة # صياغة الطلب ولا السؤال

ماتنساش راه الذكااء الصناعي ولا الجيبيتي ماكايفهمش شنو فدماغك لا ماشرحتيش ليه مزيان و إلا غادي يجاوبك على قد سؤالك، داكشي علاش شحال ما كان الطلب ديال واضح و باين و شبعان تفاصيل و ديطاي شحال ما كانت النتيجة اللي غادي يعطيك الجيبيتي في قمة الروعة و الدقة فالأداء، يعني عوض ما تقوليه بغيت شي سيناريو ديال فيلم أكشن، جرب تقول مثلا بغيت سيناريو على شي بطل غادي يبني راسو من الصفر و غادي يوقع فمشاكل مع الأعداء و…. المهم كمل من راسك داكشي ديال أفلام قصيرة.. غير المهم دير فبالك شحال ما عطيتي ديال التفاصيل شحال ما النتيجة غادي تعجبك..

الخطوة الرابعة # تقبل المحاولات الفاشلة

خاصك تفهم و تعرف بأن الذكاء الصناعي واخا هاد الحالة و الهيلمان و الحيحة راه مازال فالبدايات ديالو و باقي كايتطور يعني ضروري من الأغلاط و الإجابات الخارجة عن الموضوع و الإختراعات العجيبة فالإبداع و أنا كاتعجبني فالصراحة فاش كايهرب ليها و كاتبقى تخترع عليك، و لكن المفيد هو ماشي ضروري غادي تصدق ليك من أول محاولة و لكن شحال ما بقيتي كاتحدد و تعاون الذكاء بالافكار و التفاصيل شحال ما كايقربك للنتيجة المطلوبة و ضروري جدا المراجعة و التنقيح حيت فالعربية و الدارجة باقي الأغلاط…

الخطوة الخامسة # ماعمرك غادي تقول هرب لي الإلهام

عوض ما غادي تبقى واحل كاتشوف فالسقف ولا كاتخمم و سارح ولا كاتسكرولي و كاتقلب على فكرة للمقال الجاي ولا فكرة للفيديو اللي باغي تصور مع القوة ديال الذكاااء و الجيبيتي بالزربة تقدر تقوليه يقترح عليك أي لعبة بالخف تلقى راسك واحل غير باش تختار أي وحدة تبدا بيها حيت اي حاجة كايقولها كاتلقاها خدامة..
مازال كانعقل فالبدايات العام اللي فات بقيت واحل غير مع عناوين المقالات جمعت شي خمسين ألف عنوان مقال مختلف فمجالات مختلفة و بقيت دايخ معاها زعما فوقاش تحبس و تقولبقات كاتعطيني حتى تبلوكيت وليت بقوة ما بزاااف و كولشي نافع كاندوخ شنو سدنسبق و شنو نوخر و باش نبدا و باش نسالي، و وليت كانشوف راسي الوقت قليل باش تدير كولشي بقوة ما بصح كاين بزااااااااااااف ديال الخدمة و لكن اللي يخدمها والو… الخلاصة من هادشي هو كيف كايقولو صحاب الغرب البرينسطورمين Brain storming ولا العصف الذهني اللي كاينفع بزاااف فلانسبيراسيو و إكتشاف أفكار جديدة ولا سهل بزااااااااااااف مع جيبيتي عندك فالتلفون.
كل مرة تفتح فيه شاط مع جيبيتي بحال لا جبدتي مصباح علي بابا… هههههههههه

الخطوة السادسة # إكمال تحدي صناعة المحتوى الإحترافي

نقدرو نقولو أن الجيبيتي ولا الذكاء الصناعي على العموم هو الكاتب الوهمي الخاص بكل فرد حالياً باش تقدر تدير محتوى خاص بيك كيف ما كان مكتوب صوتي ولا فيديو كااااع..
بغيتي مقالات لشي مدونة ولا بلوغ ولا كومونطيرات ناضيين من عند الذكاء ولا حتى شي وصف لشي منتوج تدير ليه إشهار؟؟ أي حاجة إحتاجيتيها يقدر الذكاء يكون هو الخادم السحري اللي يقدر يلبي الجلبات و يدير بلاصتك الخدمة كاملة و بكامل الإحتراف يحدد ليك حتى الفئة المستهدفة أنت غير تفرج فالعجب كيفاش كايدير ليها و يقادها على حسب الأسلوب ديالك فالكتابة لدرجة أنت غادي تدوخ بحال اللي كايوقع لي شي مرات ماكانعرفش واش انا اللي كتبت المقال ولا كتبو الذاكا..

الخطوة السابعة # الإحتراف فالترجمة

وا تخيل دابا لا جينا نهدرو على الترجمة من غير.داكشي ديال تكتب للذكا ولا تهدر معاه بأي لغة يقدر يفهمك و يجاوبك و إنما تقدر تقوليه يترجم ليك أي حاجة من أي لغة للغة اللي بغيتي، يعني تخايل معايا داك اللعبة ديال مافهمتش راني ماكانعرفش هاد اللغة ماغاديش يبقى… و زييييد شلا مايدار أخر..

الخطوة الثامنة # كيفاش داكشي يولي طوماتيك

هاااااااا المعقول ماغاديش نخلعك بالنيفو الهربان نبداو غير بداكشي الساهل، بغيتي تلخص شي مقال طويل ولا تخرج منو النقط الأساسية ولا تصاوب شي جدول من شي وثيقة ولا شي بلان ؟؟؟
قصد جيبيتي عطيها اللينك و قوليها تقضي ليك الغرض و تفرج فالخلعة يا عمي… كيفاش غادي تهنى من ساعات ديال القراية و التلخيص و هادي خدامة هادي لا دابا وليتي كاتدير دوبل كليك كايخرج ليك المفيد و لا بغيتي تأكد عاود القراية و لكن كاتربح الوقت على كل حال باش تدير حوايج أخرى هادي زعما كاتنفع فالحياة…

الخطوة التاسعة # دابا أجبد لينا لا عندك شي إبداع

الذاكا راه ماشي سكريتيرة راه أي حاجة تخيلتيها يمشي معاك فيها لشي مواصل مانقدرش نشرح ليك ولا نعطيك وصف من غير أنه بصح الصدمة غادي تكون كبيييرة فاش غادي تكتاشف شنو أي واحد يقدر يدير بالذاااكا و القدرات ديالو لا عرف كيفاش يستغلهم، واش منك بديا أغاني يا قصص يا كتب الناس راه دارت لاباس غير فعامين تقريباً من هادشي شي حاجة بزاااااف على الواقع راه غير فهاد العالم داكشي مامساويش أوما كون راه عايشين فالخيال العلمي..

النصيحة العاشرة # عمرك تنسى راه أنت هو المعلم و الشاف

عنداك تدوخ و تبدا تساوي مع الروبو و تدير بحال دوك المكلخين اللي ولاو باغيين يعبدو الروبوت و يقوليك هو ربهم الأذكى أستغفر الله، دير فبالك راه غير ماكينة خدامة عندك باش تعاونك فهاد العالم الديجيطالي تقضي الأغراض و تسهل عليك بزااف ديال الحوايج و لكن ديما حضي معاها لا تدخل ليك شي فشي حيت على حسب ما شفت الأغلاط ديما كاينين و كاينة واحد النسبة ديال التحيز فالنتائج تقدر تبان ليكم مع الوقت..
المهم ماتنساش أن المحتوى ديال الذكاء ماعمرو ماغادي ياخذ بلاصة المحتوى الإبداعي البشري..

نصيحة إضافية لوجه الله ♥️ إستكشف العالم و المجتمعات

العالم ديال الأنترنت نايضة فيه الروينة بقوة الجديد و الإكتشافات و ديما الجديد، داكشي لاش النصيحة هي ماتضيعش الوقت ديالك فالسطوريات و البروفيلات و اللايفات الخاويين حاول تكتشف شنو كايخرج كل نهار فأنترنت باش تقدر تسهل على راسك الحياة و هادشي كامل من أجل البقاء..

و هادشي اللي قلناه ماشي الخلاصة الكاملة و الشاملة و إنما غير مدهل لعالم الديجيطال اللي غادي نحاولو فالقريب العاجل باش نعطيوكم نظرة موسعة و شاسعة على الخبايا ديال عالم الديجيطال و كيفاش تقدرو تدبرو منو على راسكم و تعاونو بيه على تحديات الحياة في مغربنا الحبيب و إلى مقال أخر بإذن الله، دمتم في رعايته.